Vieiros

Carlos Taibo: "Cómpre cuestionar a teoría dos que pensan que a autodeterminación dos pobos non é posíbel porque conculca as leis dos Estados"

O profesor titular de Ciencia Política na Universidade Autónoma de Madrid, especializado entre outras cousas no conflito dos Balcáns, afirma que aínda que é certo que detrás da declaración de independencia de Cosova están os intereses de Estados Unidos, a secesión non se explica por si soa con este argumento. "EUA xa ten unha chea de países aliados na rexión, como Bulgaria, Romanía, Croacia, ... o que de verdade leva á independencia é o criterio dunha abraiante maioría", di.

Preguntado pola posibilidade de que, tal e como apuntan algúns expertos, Cosova se converta ou ben nun membro próspero da UE ou ben nun enclave da delincuencia organizada, Taibo considera que se producirá unha mestura das dúas cousas. Porén, afirma, "non se pode analizar Cosova como un singularismo afastado do resto" de países da zona. "Tamén Serbia conta con mafias", sinala.

Ao respecto das similitudes que poidan existir entre o nacemento do novo estado e os movementos autodeterministas catalán, vasco e galego, Taibo matiza, en primeiro lugar, que o de Cosova é un "proceso de independencia tutelada; non houbo autodeterminación, xa que non houbo consulta popular". "Cataluña, Euskadi e Galiza coido que miran máis cara ao caso de Quebec-Canadá, que cara a Cosova, que é un modelo de desintegración violenta e de medidas represivas".

Neste senso, salienta a declaración da voceira do goberno vasco ao respecto, quen afirmou que a independencia de Cosova supón unha "lección". Carlos Taibo considera "non demasiado afortunadas en parte" estas palabras, aínda que concorda no senso de que "cómpre cuestionar a teoría dos que pensan que autodeterminación dos pobos non é posíbel porque conculca as leis dos Estados, como ocorre, por poñer un exemplo, no caso de Israel e que impide a creación dun Estado palestino".


Xosé Manuel Beiras: "Se os pactos só valen cando lle convén á comunidade internacional, non sei porque non o podemos facer nós tamén"

O secretario de Alternativas Programáticas do BNG e membro da súa Executiva Nacional, Xosé Manuel Beiras, amosase crítico coa postura da comunidade internacional -"se é que existe ese ente", ironiza-, por aceptar sen prexuízos a declaración unilateral de independencia cosovar, namentres que "aquí nin sequera se pode facer nin unha reforma estatutaria porque se rompe non sei que".

"Se os pactos só valen cando lle convén á comunidade internacional, non sei porque non o podemos facer nós tamén", afirma Beiras. Ademais, rexeita falar de 'unilateralidade' neste caso, xa que Cosova contou "co apoio de Estados Unidos", que segundo el, estase a instalar no perímetro da antiga Unión Soviética e que xa axudou no seu momento a desestabilizar deliberadamente a rexión: "A confederación (iugoslava) rompeu grazas á dinamita que lle colocaron EUA e Alemaña".

Xosé Manuel Beiras analiza tamén en clave estatal a situación. "En 1995, pouco antes das eleccións que perdeu o PSOE, invitáronme a un curso de verán en El Escorial para falar de 'cuestións nacionais'; na mesma mesa de debate estaba entre outros Mariano Rajoy, quen preguntado por un rapaz da audiencia sobre a posibilidade de que se producise un plebiscito en Euskadi sobre a independencia, aprobado por unha ampla maioría, el como demócrata que era o acataría".


Dani Álvarez: "O goberno vasco aproveita Cosova para criticar tanto ao goberno español como á esquerda abertzale"

Dani Álvarez, xornalista de Radio Euskadi e habitual colaborador de Vieiros, recoñece que unha noticia como é a independencia de Cosova, "en época electoral, é un regalo para o goberno vasco". "O caso de Cosova preséntano como o exemplo de como se deben facer as cousas, para que sexa recoñecido o dereito a decidir", porque precisamente "isto é o que se demanda; mesmo dende a esquerda abertzale o que se pide é o dereito de autodeterminación, non a independencia".

Literalmente, segundo as palabras da portavoz, Miren Azkarate, o proceso de independencia cosovar é un exemplo de "resolver de forma pacífica e democrática conflitos de identidade e de pertenza". Ademais, sinala Dani Álvarez, "aproveita para botarllo en cara tanto ao goberno español como á esquerda abertzale".

Porén, non todos os socios de goberno, nomeadamente Ezker Batua, comparten esta visión, segundo o xornalista de Radio Euskadi. Así, este mesmo luns, o coordinador xeral da formación, Javier Madrazo, advertiu de que eles non queren a independencia.

O máis salientábel, no entanto, da actual situación política é que a declaración de independencia se producise unilateralmente, o que en opinión de Dani Álvarez "pon en evidencia ao goberno español". "A vista dende Euskadi está posta no modelo de proceso de Montenegro ou de Irlanda do Norte", conclúe.


Roberto Mansilla: "Queda por ver se a independencia é o fin último de Cosova, e non a formación dunha gran Albania"

Mansilla, licenciado en Ciencia Política pola Universidade Central de Venezuela e analista do Instituto Galego de Análise e Documentación Internacional (IGADI), considera que Serbia "asumira xa hai tempo a independencia de Cosova". "O obxectivo agora é asegurar a estabilidade da minoría serbia", di.

"Tanto Estados Unidos como a Unión Europea -aínda que esta non votou completamente a favor- son partidarios á creación dun estado favorábel aos intereses occidentais", reflexiona Roberto Mansilla, que afirma ademais que, "aínda que non se pode desdeñar, ou cualificar de artificial", o seu nacemento fíxose con "demasiada celeridade" e "aprobado unilateralmente".

Respecto ao futuro do novo estado, Mansilla cuestiónase a situación a medio ou longo prazo: "Queda por ver se a independencia é o fin último de Cosova, e non a formación dunha gran Albania". "Cómpre lembrar que o actual primeiro ministro, Hashim Thaci, liderou o Exército de Liberación de Cosova (UÇK)", unha organización albanesa. De calquera xeito, o que si está claro é que "fica sepultado o gran estado iugoslavo", di.

Critica tamén da dobre vara de medir á hora de aceptar a promulgación unilateral por parte dos países de Occidente: "Alá nos Balcáns si, porque hai unha ocupación militar legalizada, porque houbo unha guerra -ilegal- que non foi votada polo Consello de Seguridade da ONU ...?".

• O goberno español pide que se defenda o principio de "integridade territorial dos Estados"

• EUA e os principais países da UE recoñecen oficialmente o novo estado de Cosova